حروف ساكنة

" حروف ساكنة "


انا مش هذوق كلامي

ولا هلبس التوب العليل

ولا هدوق المر تاني ..

ولا هنهي كلمتي بعويل ..

طب ما انتي عارفه كل حاجة

ولا لازم كل كلمة من لسنا

تميل ..

زي ما مِلنا

ومَلْ منا كل شيء

واكتفينا بالهم التقيل ..

طب ليه تنادي في الخفا

" انجدوني " " قوموني "

كيف انجدك قولي ...

ولا انتي مش شايفه ...

كل الكلام فـ حبك

أحلام بتتخفّي ..

أحلامنا مرصوصة

علي الميزان خفّه

مكسوفة من اسمها

ملهوفة علي رسمها

رمت بعيد تقلها ..

بقت بيوت هشه ..

واقفه بتتمنظر....

ماشيه بتتمخر ..

والذل علي كتفها

لكن بتتغندر ...

فاكره عيون الناس ..

مش كاشفه سكرها

الي اتلحس بالزور

وهي فــ الاقسام

واقفه بتتكدر ...

ازاي احبك قوللي

بكلمة مسموعة

وانت بتتعري

تترقصي للخلق

بهدمة مقطوعة

وتفقدي شرفك

تتسولي ترفك

وكرامتي متهانة

في الذل منقوعة ...

وانا بجري يوم ملهوف

انفاسي مقطوعة

شبحك يطاردني ..

وانتي بتتمايلي ..

وانتي بتتحايلي...

وانتي بتتهاني

وانا ضعيف واقف

وايديا مرفوعة
..

واليوم بناديلك

امتي تناديني ؟

وانا اوهبك قلبي ..

والكلمة من حرفي ..

والدم من جسمي

واللحم من خيرك

والقلب من صدري ...

لكن تناديني ...

مرة تنادي ..

مستكترة الندهة ..

ما هو الي هرب زمان ...

جابلك اكيد سكته ..

فكي قيود اللسان

واتكلمي كلمه ..

لو تنطقي كلمه ..

ولا الحروف في كلامك

كلها ساكنة...