الجمعة، 20 مايو، 2011

طلة قلوب


طلة قلوب


ميدان التحرير - ثورة 25 يناير -


ادي القلوب طلت زي فرع الني

مغمورة لكن ..اشهر المشاهير

الفرد فيها معروف بصوت الجمع

تسمعها هتافها ..كأنه صوت ترانيم

الحانها يطرب ليها قلب وسمع ..

السيمفونية ابتدت علي مسرح التحرير ..

والدعوة عامة وحرة .....

من غير لا لون ولا دين ..

*******

ادي القلوب طلت زي فروع الشجر

تزهق وتطرد وراقها ان اصابها ضجر

وساعات تميل وتحن ..

مـ الحب والاحلام ..

عمرها ما تمل ..

تسهر فـ ضوء القمر

تحفظ تصون السر ..

والهامة شامخة وعالية ......ملايين تجيب ملايين ..

*******

ادي القلوب طلت ...والملوك طارت

الشعب قرر يجازف ..

ويا خابت ويا صابت

وكأنها قيامة وف الشعوب قامت

واديها جابت و صابت

والكلاب غابت ..

وعيون بدمع الفرح ....سالت

كل الهموم م القلب..... زالت

الا هموم الوطن ..... ما هانت وما غابت

والحلم اصبح حقيقة .....بقي حكم بقي تمكين ..

*********

ادي القلوب طلت بنور القمر

صبّح عليها وانحني من غير سؤال

الصبح جه بالموت

جه بالتعب ... بعد السهر

ف يوم و ليلة الظلم زال واتشال .

وراق مزاجنا والعدل فاق وانتصر

وقلوبنا ضحكت وصبحنا عال العال ..

*******

يا شعب يا مجنون ...

لكن جنان محسوب

ياما كنت ناسي وخايف

برضاك ومش مغصوب

وسيباها تستهبل ...

وتحدفك بالطوب

وتسوق عليك العيال ...

قلت ده مش اسلوب ...

وادي النتيجة ف طرة ....

ردك يكون رادع

تقلبها ضلمة ف ثواني ..

وزل ومواجع

تضرب بكفك الوف ...تهززلك اراضين

صاحي بتنطق " والحق ليك راجع " ...

والحق مفهوش شفاعة ...وشغل متعاطفين

ان قالو اسف ..

فاحنا مش آسفين

الحكم بقي للشعب ...

انسو بقي الفراعين ..

كل الفراعنة انتهو ...

ومصيرهم الزنازين

********

ادي القلوب طلت ...

علي الارض وما خلت

الا ربيع وجمال ...

دم الشهيد يروي ..

ورودنا ف البستان ...

فاتحين صدورهم يقابلو الموت بحب وشوق

وحروف اساميهم ...منشورة ف الاكوان

*********

يا شهيد ما تنسانا ولا ننساك ..

وبشوق علي باب الجنان هنستناك ..

يا بحر ثاير ..ومتقلب علي الجنبين

الجنة شطك وبابها بقي مرساك ..

اشفعلنا فـ الاخرة يا ضي العين ..

يا مدخل النور ..وفاتحلنا الشباك

الكل عارفك وميختفلش اتنين ..

حافظين ملامحك وعمرنا ما ننساك ..

حافظين ملامحك وعمرنا ما ننساك ..

هناك 3 تعليقات:

abdelrahman يقول...

رائعة سلمت يمناك

:))

شوشو يقول...

حلوه اووووووووووووووووى

شوشو يقول...

انا عايزه تعلمنى دا يا عمو احمد